الرئيسية / السيارات / اخبار السيارات / العفشه الاسبورت نظام التعليق الرياضى لسيارات

العفشه الاسبورت نظام التعليق الرياضى لسيارات

ما هو نظام التعليق الرياضى او العفشه الاسبورت مكوناتها ادائها

موضوع مهم و محير نص شباب مصر و هنتكلم النهاردة عنها
” العفشة الأسبور ” … ?

بص لما تيجى تتكلم عن عفشة سبور
عاوزك تشيل من قاموسك كلمة نعومة و سلاسة و هدوء …
لان العفشة الاسبور أنشف مما تتخيل ..
طب لية بتبقى ناشفة كدة ؟
عشان بيبقى ليها قدرة اعلى على تحمل و امتصاص الصدمات و الثبات الجبار اللى على السرعات العالية بس بيبقى على حساب راحتك فى العربية

عكس العفشة العادية بتكون نعمة و هادية بس مش بتديك الاداء بتاع العفشة الاسبور
ماحنا قولنا بقى انها بتدى ثبات اعلى على حساب راحتك ..
و ديما اى عربية عليها جنط كبير يعنى من اول 18 كدة و ال 17 زى بتاع الريو و السيراتو و الحاجات دى بتلاقى عفشتهم ناشفة و الكاوتش بتاعهم
بيعمل بلالين كتير ..
بسبب الطرق بتاعتنا

?

العفشة الرياضية هى هى نفس مكونات العفشة العادية بمعنى أن بيجى فيها
1 – مساعدين
2 – سوست
3 – بطاحات
4 – مقصات

تعالوا الاول نعرف مميزات العفشة الرياضية ..
● ثبات مختلف تمام عن العفشة العادية
● أنسى حوار التنطيط اللى بتحسة ورا دة من ضهر العربية
● لما هتدوس فرامل وش العربية مش هينزل يدلق تحت على الارض لان اصلا العفشة الرياضية ليها حدود مش بتنزل عنها
● هتحس ان العربية راسية و ماسكة فى الارض كدة و هتديك احساس كامل بالسيطرة على العربية

عيوب العفشة الرياضية بقى

● بص كل زلطة هتحس بيها فى الطريق
● لو انت مش سواق صح هتبهدل العربية من تحت
بمعنى ان العربية بتكون قريبة من الارض
لازم يكون ليك زى خط سير تمشى علية عشان متبوظش العربية و العتب من تحت لازم تكون حريص جدا و انت بتاخد المطب و تاخدة بجنب العربية مش بوشها ( مقص يعنى ) و تبعد عن النقر و البلاعات

لان اقل حاجة هتبوظلك الفردة غير الضرر اللى هيحصل فى جسم العربية
● هتنسى معنى النعومة مقابل الثبات ..

__________

ب أختصار
متجبش عفشة عادية و تطلب منها تديلك اداء و ثبات العفشة الاسبور
و متجبش العفشة الاسبور و تطلب منها نعومة و راحة العفشة العادية ..
هى بتبقى حاجة على حساب حاجة
ثبات مقابل عدم راحة
راحة مقابل قلة ثبات ..

طب لية كل العفشات الرياضية بتخلى العربية توطى يعنى لية مينفعش اركب عفشة سبور بنفس علو العفشة العادية ؟

مينفعش لانك كدة مش هتبقى عملت اختلاف
انت شيلت عفشة و حطيت عفشة

لازم العفشة الاسبور توطى العربية
لان كل لما العربية توطى و تقرب من الارض كل لما مركز الثقل يقرب من الارض بالتالى الثبات يزيد
و يبقى سهل عدم قلب العربية
و السيطرة و التحكم فيها هيكون اسهل ..

طب ياعم نادر اية أفضل انواع العفشات الرياضية الموجودة فى السوق ؟
هما ماركتين بس اللى بحترمهم غير كدة شكليات
1 – ال Coil Over
2 – ال D2
دول انضف عفشتين سبور ممكن تركبهم
طب بالنسبة للأفضل فيهم اية ؟

أنا بحب Coil Over
لان فيها عدة مميزات ..
● معمرة جدا
● تقدر تتحكم فى انخفاض و ارتفاع العربية
بحيث انك مثلا لو عارف انك رايح مشوار كلة مطبات و طريق زفت
هتقدر تحل كل عجلة و ترفع مستوى السوست تقوم العربية تعلى عن الارض اكنها عفشة عادية
و تقدر برضة تجيبها على الارض ?

و دى ميزة قوية جدا ان العفشة دى بتجمعلك بين حاجتين ..
القيادة الرياضية و نفس الوقت استخدام ال Daily Use و بتسمحلك انك تركب افراد كتير و تسافر و تروح و تيجى ..

طب بالنسبة للأسعار ؟
بتبدأ من 5500 – 5000 و انت طالع و السعر بيفرق حسب نوع العربية ..
و اتوقع انها هتغلى اكتر من كدة كتير الدولار داخل على 10 جنية ?

ينفع اركب على اى عربية عفشة سبور ؟
– أة ينفع عادى

العفشة الاسبور عملية ولا لا ؟
عملية لو انت بتمشى على طرق طوالى كتير و مفهاش مطبات و نقر و بلاعات كتير
غير كدة يبقى انت بتبوظ اساس عربيتك مع الوقت ..

أجبها منين ؟
من محلات التعديل و المراكز النضيفة اللى بتعدل
مش هنقول اسامى معينة على العام عشان محدش يقول انت بتعمل دعاية لفلان و علان
اللى عاوز يستفسر فية حاجة اسمها رسايل ?

فية من العفشة الرياضية استيراد ؟
أة فية و مش هنقول مين على العام برضة ??

و بكدة تقريبا أكون غطيت معظم أسئلتكم
و استفسارتكم بخصوص العفشة الرياضية …

كدة خلصنا ?
منشن لصاحبك
شير و فيد غيرك ..

شاهد أيضاً

مواصفات رينو» الفرنسية سيارتها المدمجة الرياضية ميجان الجديدة GTوميجان استيت

رينو» الفرنسية سيارتها المدمجة الرياضية ميجان الجديدة GTوميجان استيت زودت شركة «رينو» الفرنسية سيارتها المدمجة …

تعليق واحد

  1. ارجو التواصل لمعرفة الأماكن والأسعار
    وشكرا للاهتمام

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *