الرئيسية / السيارات / عمره الموتور اسبابها وطريقه إصلاحها بالخطوات والشرح

عمره الموتور اسبابها وطريقه إصلاحها بالخطوات والشرح

عمره الموتور اسبابها وطريقه إصلاحها بالخطوات والشرح

ماتيجوا ناخد جوله بسرعه كده مع العمره ونعرف بنعملها ليه وازاى وبنغير فيها ايه وايه الفرق بينها وبين الشورت بلوك ؟! 😉😉

طب نبدا بالاسباب اللى تخلينا نعمل عمره للموتور
١ -الموتور رزع
يعنى حضرتك مثلا مشيت على الموتور من غير زيت او الزيت اللى عندك كان تعبان فمقدرش يقوم بعملية التزيت
وتلاقى اللى حصل ان السبيكه اللى على الكرنك من تحت تاكلت واصبح فى بوش مابين السبيكه والكرنك ودا مع دوسة البنزين هتلاقى فى صوت ترزيع ظهر معاك

٢ – العربيه سخنت جامد وحضرتك مشيت عليها كده
لحد لما جوان وش السلندر ضرب وخلى الباساتم تسيح او تسلخ او الموتور قفش من السخنية

٣ – انتهاء العمر الافتراضى للموتور
ودا كده الموتور بيقولك انا خلاص شطبت وفوتط وجبت اخرى ومبقتش قادر احرك لك عربيتك من مكانها

 

 

 

 

 

 

ودى كانت الاسباب اللى عليها العين والننى اللى بتخلينا نلجا للعمره
نعرف بقى بنعمل فى العمره ايه ؟! 😊😊

اولا بيتم فك الموتور قطعه قطعه وبيكون الشغل متمركز على النصين بتوعه
النص الاول هوا وش السلندر و النص التانى هو البلوك ( الفرغه)
اولا لو الكرنك مسلم نمر وفى ترزيع بناخد البلوك بالكرنك والباساتم ونطلع على عمو الخراط
هيعمل عملية خراطه للكرنك ويجيب سبيكه جديده ويحطها فى الموتور 😐
نيجى بقا للباساتم
لو الباساتم فيها مشكله زى ان يكون فيها تسليخ نتيجة ان الشمبر خلص والاحتاك زاد بينها وبين الشمايز هيحل فيها تسليخ وهنضطر نغيرهم 😞
وفى فى الباساتم حاجه اسمها البنوز ودى عباره عن الاكسات اللى بتخلى راس البستم ماسكه فى حاجه اسمها البيلات ودى اللى بتنقل الحركه من الكرنك للراس البستم
لو البنوز دى تاكلت هيبقى فى بوش ودا هيسبب فى صوت رنه فى الموتور
ففى الحاله دى ياما الخراط يتصرف ويعمل طقم بنوز
ياما بردوا هتجيب طقم بستم

نيجى بقا لنقطه مهمه لو حضرتك مثلا عندك الشمايز ثابته او مش بتتغير 😞😞
وحصل. فيها تاكل الخراط فى الحاله دى ياما بيزودهم او بيخرطهم ويخليك تيجيب طقم بستم اكبر ويقولك احنا كده خرطنا مثلا من الاستندر الى 020 _مثلا

ومنساش طبعا طقم الهلالات اللى بيركب علىةالكرنك وبيمنع حركته مع دوسة الدبرياج ودا لو متاكل هيخلى الكرنك رايح جاى ودا يضر الباساتم فالخراط بيعمل ٢ لو بتوعك متاكلين 😕😕

كده خلاص الدنيا تمام بالنسبه للبلوك وكل حاجته جاهزه
نطلع بقا ع وش السلندر نبص عليه
لاقيناه سليم كان بها يتغسل وينضف ويبقى فل الفل ويتعمل اختبار للصباب
لاقينا فى مشكله ناخده ونطلع على عمو الخراط
سواء المشكله دى فى الصباب وهيتغير ولا لا ولا عايز روديه ولا فى مشكله فى الوش وهيتقشط مثلا 😊😊

كده خلصنا الجزئين المهمين نخش على الفرعيات بقا
اهم حاجه انك تبقى عارف انك هتدفع جامد فى العمره بس هتبقى مضمونه
يعنى مثلا هتنزل تجيب طقم جوان كامل
وهتجيب زيت وفلتر
طقم شمبر جديد
وهتجيب كاتينه جديده بالبليه بتاعتها
وينصح دايما بتغير طلمبة الزيت ولو مش هتغيرها بص كويس واكشف على القديمه
ولو قواعد الموتور فيها حاجه هتغيرهم بالمره
اكشف على طلمبة المياه وحالته ولو فيها خشانه هنغيرها طبعا
وعشان خطرى سلك الرادياتير ونضفه فى السكه عشان تبقى العربيه مستريحه فى التلين
وطبعا نخش على التلين بقا
اولا ممنوع منعا باتا التلين فى الحر او درجات الحرارة العالية عشان انت كده ممكن الموتور يقفش معاك بسبب تمدد اجزاءه لان هوا بيبقى محمل عشان كل الحاجه جديدة

😮

اول لما ربنا يكرمنا والعربيه تدور وتلين نفضل متابعينها ونشيل جمبها مياه ونفضل باصين للحراره بتاعتها لو عليت عن المعتاد نبطلها ونسيبها تريح وندورها تانى

وبلاش تشغل تكييف ياباشا والعربيه بتلين عشان متسخنش الموتور وتبقى حاطط عليه حمل زيادة لان هوا بيبقى محمل اصلا من جوا 😞😞

مدة التلين المعقوله هو ان العربيه تحرق صفيحه بنزين
واول ١٠٠ كيلو بعد الصفيحه تمشيهم بالراحه خالص من غير قرص او حرق ع العربيه بعد كده ابدا افتح سرعتك وشدك واحده واحده

بعد انتها فترة التلين يفضل تغير الزيت والفلتر مباشرة لانهم بيبقى فيهم رواسب معدنيه كتير مكان التطبيع بتاع اجزاء الموتور 😐😐

كده قولنا نبذه سريعه عن العمره
وخلى بالك العمره اينعم مصاريفها كتير وانت بتجيب حاجات كتير بس ان شاء الله بنبقى مضمونه

انما الشورت بلوك هو حل سريع وارخص من العمره لان انت بتجيب موتور كامل وتريح دماغك وكده مش هيبقى معاك الخراط اصلا بس فيها سنة مجازفه
لان الموتور اللى انت جايبه دا مش جديد بالكرتونه
لا دا اسمه استيراد يعنى كان شغال قبل كده
وممكن تجيبه وتركبه وتحطله زيوت وتدوره تلاقيه بيدخن او بيرزع وساعتها هضطر تفكه وترجعه وتجيب واحد مكانه والصنايعى ساعتها مش هيسبك على الفك والتركيب فى كل مره 😬😬

سواء عمره او شورت بلوك فحضرتك اعلم بظروفك عن اى حد 😉😉
والعمره بيبقى وقتها اطول من الشورت عشان الخراط بيحتاج وقت دا غير ان بيبقى فى يوم بتنزل تجيب فيه قطع الغيار 😉😉#

شاهد أيضاً

سعر الدولار اليوم السبت 1-4-2017 في البنوك والسوق السوداء

جاء سعر الدولار اليوم الجمعة في البنوك والسوق السوداء، ليقف ثابتًا كما هو دون حدوث …

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *